من غير تمن .!!

دق الجرس .. شكى للمزاد همُّه

أصل الجرس بيحس على دمه

والندل باع أمه ولا همُّه

بالذِّمه فيه راجل يبيع أمه ..؟!

ألا أونا بعنا التوب وعرِّينا

ألا دو لبسنا العار وجرِّينا

وتْرى زرعنا الشوك ما خلِّينا

ألا أونا بعنا التوب وعرِّينا وفضحناها قُصاد الكل

ألا دو لبسنا العار وجرِّينا ديول الذل

وتْرى زرعنا الشوك ما خلِّينا مكان للفُل

الأوِّله كان المزاد ع الأرض

والتانْيه دى كانت تخص العَرض

والتالْته راح فيها السُّنن والفرض

قرَّب يا بيه .. قرَّب يا واد

أرخص مزاد

بنبيع وطن

بنبيع سنين ..وتاريخ ودين

من غير تمن

بنبيع كتب لأمنحتب

وعلوم وفن

بنبيع كيان .. مات من زمان

وسْط المحن

بنبيع شهيد

ـ علشان يعيش مليون وليد ـ

مات واندفن

بنبيع خَضَار .. بنبيع عَمَار ..

بنبيع قبور .. حتى الكفن

بنبيع أثرنا وحضن دارنا

لجْل جارنا يعيش ..

وينعَم بالسَّكن

مش دينَّا برضه قال فى فرضه

إننا نْراعى الجوار ..؟!

خِلِص

الحوار

0منقووول0....

الموضوع الأصلي : من غير تمن .!! المصدر : شبح الالعاب